Koɗo men hannde

Kaaldal ngenndi Sénégal fuɗɗike hanki. Gila ɗoo haa ñannde 4 lewru 6ɓuru, dawroyankooɓe, yimɓe sosiyete siwil, sinndikaaɓe e ardiiɓe diina e fina-tawaa hino renndi ngam taskagol peeje semmbinooje demokarasi. Ɗum ko ngam tabintingol deeƴere e teddingol hakkeeji neɗɗanke e nder wertaango leydi ndin. Pelle mawɗe Sénégal heewɗe tawtii ndee jonnde so wonaa fedde politik APR, nde hooreejo leydi kiɗɗo Macky Sall. Mbele waasde yimɓe Macky Sall taweede e ngal kaaldal ustan darnnde maggal ? Mbele ngal waawan jibinnde nanondiral hakkunde laamu nguu e lunndiiɓe ɓee haa hewta sinndikaaɓe ? Koɗo men hannde ko Mamadou Albert Sy, hertorɗo dawro. Himo jaaboo lamnde Ibrahima Timbi Bah.

Hannde Dental Leyɗe CEDEAO heɓii duuɓi 50. Ko e hitaande 1975 ndee walde sincaa. Ka fuɗɗoode faandaare mayre ko ɓamtal faggudu e faamondiral e nder diiwal ngal e dow newaare yaha ara yimɓe leyɗe maggal. Si tawii ɓamtaare dañaama e oo fannu, to banŋe politik e ndeenaagu ko haana waɗeede kon hino ɗuuɗi. E ɗii duuɓi sakkitiiɗi, kuliyankaaku ɓeydike e nder leyɗe goɗɗe CEDEAO, ciwle walla liɓe laamu jaalike. Ko ɓeydii ɗon ko yaltugul Mali, Burkina Faso e Niger e nder ndee fedde. Ɗum no holli ndee walde hino jogii caɗeele. Holko saabii CEDEAO waawaali aditaade walla falaade ɗee caɗeele? Hol peeje haana ɓameede ngam danndugol ndee fedde? Koɗo men hannde ko Lansana Kouyaté, hooreejo jaagorɓe Guinée kiɗɗo, hooreejo ngoomu CEDEAO kiɗɗo. Himo jaaboo lamnde Ibrahima Timbi Bah.

Suudu ñaawirdu CEDEAO taƴii ñaawoore e hoore Senegaal caggal nde hooreeɓe ndii leydi tonngi internet e hitaande 2023 saaha nde seppooji mawɗi waɗi ɓawto nanngugol Usmaan Sonko naadamo Kaso. Nduu ñaawridu hollii wonndema laamu Macky Sall lunndike sariya, bonnii hakkeeji ndimaagu konngol. Kono, wonaa e ngol laawol ɗoo nduu ñaawridu  CEDEAO fuɗɗii fawugol leyɗe yagginanɗe sabu taƴugol internet. Hari ndu taƴii ñaawoore e hoore Togo e Gine. Kono ɗee ñaawooje accinaali ngol lunndaagol ndimaagu konngol. Holko saabii ɗum? Ko holɗum haanaa waɗeede ngam ñinnugol ɗee ñaawooje? Koɗo men hannde ko Mamadou Alpha Diallo, tawaaɗo e ardiiɓe fedde blogerɓe Gine, no wi’ee ABLOGUI. Himo jaaboo lamnde Ibrahima Timbi Bah.

Kaaldigal gadanal hakkunde fedde leyɗe Sahel e imminaaɓe Cedeao, ɗum caggal nde leyɗeele AES yalti e nder fedde CEDEAO. Ko ñannde 22 nduu lewru yuɓɓinaa to Bamako, laamorde Mali. Holko firti walla no mbaawɗen faamirde fuɗɗoonde jokkondiral hakkunde ɗee pelle ɗiɗi Afriknaaje wonnooɓe e luural caggal ciwleel laamuuji teskaaɗi e nder leyɗe maɓɓe? Hol sifaaji gollondiral mbaaw-ɗen ɗaminaade hakkunde CEDEAO e AES ? Mbele ceergal ngal ina joofni? Eɗen njeewta heen e koɗo men, Dokteer Abdu BA hertorɗo dawro e nder CEDEAO. Omo yeewtida e Abdulaay Jallo

Batu njowitiingu e garoojum jaayndeeji, ngu fedde laamuyankoore toppitiinde jaayndeeji e jokkondiral wi'eteende HAC yuɓɓini joofii hanki alarba. E nder nguu batu ngu balɗe tati jaayndiyankooɓe ñaagike udditgol jaayɗe mawɗe uddanooɗe gila hitaande jooni. Senndikaaji jaayndeeji ɗii mbi'i kadi yo fedde toppitiinde ko fayti e hoore mum darnee, tawa ina jogii ñaawirde sehilaaɓe. Koolaaɗo kuuɓal senndikaa fedde jaayndeeji Guinee Amadou Oury Barry, ina noddi ardiiɓe laamuu faddewu nguu daroo no haaniri ngam sembinde ndimaagu jaayndeeji e nder leydi Guinee. Ko kanko woni koɗo men. O yewtiɗii e Abdullay Jallo Heɗoɗen mo