Koɗo men hannde

Mauritanie, rewɓe teemeɗɗe waɗii seppo e ndee teneere ngam hollugol mette maɓɓe faade e fitinaaji faweteeɗi e rewɓe. Ngoo seppo waɗii caggal waarngo Hawa Traoré, suka debbo reeduujo doolaaɗo, waraa. Oo fitina hino ŋalɗini kono wonaa hannde o fuɗɗi. Piyugol, doola, torra, haa wara rewɓe, ko boneeji jaaliiɗi e nduu adunaaru. Rewɓe e daraniiɓe hakkeeji neɗɗanke no jokki waɗugol seppooji ngam haɓugol oo bone. Kono haa hannde o dartaaki, o ustaaki, holko saabii ɗum ? Hol haana waɗeede ngam dartingol oo bone ? Koɗo men hannde ko Djeynaba Touré, daraniiɗo hakkeeji rewɓe. Himo jaaboo lamnde Ibrahima Timbi Bah.

Hooreeɓe laamu faddewu Guinee no jokki laɓɓinngol e toppitagol oogirɗe leydi ndin. Permi/ Kaytaaji newnanɗi sosiyeteeji oogirɗi jawle iriiɗe’ ɗuuɗuɗi jaɓaama. Ko ɓuri sosiyeteji 200 janani e Ginenaaji haɗaama gollude. E bi’ol hardiiɓe leydi ndii, ngal pellital maɓɓe ko fi hettugol e juuɗe sosiyeteeji ɗi teddinaali adoode sifaaɗe ɗen tumɓe ɗe ɓe jonnaa ɗen, ngam ɓe waawa gollidude e soosiyeteeji kesi oogirɗi jawle iriiɗe. Ko holno yiiruɗon janngo ɗii sosiyeteeji oogirɗi ɗi kayitaaji mun jaɓitaa ? Ko holɗum sariya oogirɗe Guinee wi’i ko faatii e tottugol maa jaɓitugol e juuɗe sosiyete kaytaaji newnanɗiɗi gollude ? Koɗo men ko Akoumba JALLO hertorɗo alhaali oogirɗe Gine. Himo jaabo lamnde Faatumata Sy Savané

Kaaldal ngenndi Sénégal fuɗɗike hanki. Gila ɗoo haa ñannde 4 lewru 6ɓuru, dawroyankooɓe, yimɓe sosiyete siwil, sinndikaaɓe e ardiiɓe diina e fina-tawaa hino renndi ngam taskagol peeje semmbinooje demokarasi. Ɗum ko ngam tabintingol deeƴere e teddingol hakkeeji neɗɗanke e nder wertaango leydi ndin. Pelle mawɗe Sénégal heewɗe tawtii ndee jonnde so wonaa fedde politik APR, nde hooreejo leydi kiɗɗo Macky Sall. Mbele waasde yimɓe Macky Sall taweede e ngal kaaldal ustan darnnde maggal ? Mbele ngal waawan jibinnde nanondiral hakkunde laamu nguu e lunndiiɓe ɓee haa hewta sinndikaaɓe ? Koɗo men hannde ko Mamadou Albert Sy, hertorɗo dawro. Himo jaaboo lamnde Ibrahima Timbi Bah.

Hannde Dental Leyɗe CEDEAO heɓii duuɓi 50. Ko e hitaande 1975 ndee walde sincaa. Ka fuɗɗoode faandaare mayre ko ɓamtal faggudu e faamondiral e nder diiwal ngal e dow newaare yaha ara yimɓe leyɗe maggal. Si tawii ɓamtaare dañaama e oo fannu, to banŋe politik e ndeenaagu ko haana waɗeede kon hino ɗuuɗi. E ɗii duuɓi sakkitiiɗi, kuliyankaaku ɓeydike e nder leyɗe goɗɗe CEDEAO, ciwle walla liɓe laamu jaalike. Ko ɓeydii ɗon ko yaltugul Mali, Burkina Faso e Niger e nder ndee fedde. Ɗum no holli ndee walde hino jogii caɗeele. Holko saabii CEDEAO waawaali aditaade walla falaade ɗee caɗeele? Hol peeje haana ɓameede ngam danndugol ndee fedde? Koɗo men hannde ko Lansana Kouyaté, hooreejo jaagorɓe Guinée kiɗɗo, hooreejo ngoomu CEDEAO kiɗɗo. Himo jaaboo lamnde Ibrahima Timbi Bah.

Suudu ñaawirdu CEDEAO taƴii ñaawoore e hoore Senegaal caggal nde hooreeɓe ndii leydi tonngi internet e hitaande 2023 saaha nde seppooji mawɗi waɗi ɓawto nanngugol Usmaan Sonko naadamo Kaso. Nduu ñaawridu hollii wonndema laamu Macky Sall lunndike sariya, bonnii hakkeeji ndimaagu konngol. Kono, wonaa e ngol laawol ɗoo nduu ñaawridu  CEDEAO fuɗɗii fawugol leyɗe yagginanɗe sabu taƴugol internet. Hari ndu taƴii ñaawoore e hoore Togo e Gine. Kono ɗee ñaawooje accinaali ngol lunndaagol ndimaagu konngol. Holko saabii ɗum? Ko holɗum haanaa waɗeede ngam ñinnugol ɗee ñaawooje? Koɗo men hannde ko Mamadou Alpha Diallo, tawaaɗo e ardiiɓe fedde blogerɓe Gine, no wi’ee ABLOGUI. Himo jaaboo lamnde Ibrahima Timbi Bah.