Kuma bɛ aw bolo

Aw y'a laɲini ka kuma Israel ni Liban Kɛlɛ, Bassirou Faye ka san 2 fanga mara, Macky Sall ka cɛbɔya kan

Ani fana baŋumankɛtɔn HRW ka dantigɛlisɛbɛn fagaliwalew kan Burkina Faso.

Aw hakili la, yɛlɛma dɔ kɛra Sénégal, Bassirou Diomaye Faye ka san fila marali kɔ wa?

Bi avrilikalo tile fila bi bɛn Sénégal jamanakuntigi Bassirou Diomaye FAYE ka fanga san filanan ma. San  2024, marisikalo tile 24, Bassirou Diomaye Faye ye sebaaya sɔrɔ jamanaɲɛmaakalata la ni kan 54,28 kɛmɛsara la, o kɛra sababu ye ka PASTEF politikitɔn bila jamana sanfɛ, san caman mankanw ni wulikajɔw kɔ.   San fila fanga kɔ, mɔgɔw ka hakilanaw fɔnlen don ɲɔgɔn kɔ,  ani a ka minisiriɲɛmaa Ousmane SONKO ka cɛsiri jatibɔ ra. K'a ta sɔrɔko gɛlɛyaw ma, ani  ɲɛma fila ninnu cɛ gɛlɛyaw, fo ka taa se o tun ye lahidu minnu ta jamanadenw ye ma, yala aw fana  fɛ, Bassirou Dniomaye FAYE ka san fila fanga kɔ, kow  falenna wa? An ka bi mɔgɔ welelen ye politikiko lɔnbaga Bah TRAORE lo ye ka bɔ Dakar.

Yala aw ye RD Congo ni Jamaïque ka kunu ɲɔngɔndan ye cogo di?

RD Congo bɛ taga diɲɛ ntolantanba ɲɔgɔnkunbɛnw na san 52 kɔ, jamana in siɲɛ fɔlɔ kɔ Coupe du monde na. O sera ka latigɛ a kɛlen kɔ ka Jamaïque jamana ci celu 1 ni 0 Mexique jamana kɔnɔ baraziw hukumu kɔnɔ. Congo ka celu donbaga ye Axel TUANZEBE ye farankan wagati "Prolongation" kɔnɔ. A ko ma nɔgɔya. Ka far'ale kan, farafinna ntolantantɔnw i n'a fɔ Sénégal, Côte d'Ivoire, Maroc,  Algérie, Tunisie, Égypte,  Ghana, Cap-Vert, Afrique du Sud, olu  ye sira sɔrɔ. Yala aw ye RD Congo ka kunu ɲɔngɔndan ye cogo di?  farafinna ntolantantɔnw bɛ na se ka nɔbɔ ɲinan ka Coupe du monde ra wa?

Aw ni mun faamuya Mali ni Mauritanie ka kɔsa in furuku-furuku la?

Mauritanie y’a ka jamanaden fila ka fagali kɔn Mali dugukolo kan, olu minnu fagara mɔgɔ lakodɔnbaliw fɛ marisikalo in tile 20. Dugudenw ka fɔ ra  Mali sɔrasiw ka wale don. Nga Mauritanie marabaaw tun ye dantigɛli fɔlɔ min kɛ, u tun ma Mali kɛlɛbolo jalaki o  ko la.  Nka  ntɛnɛ tɛmɛnen  de la jamana in kɔnɔko minisiriso y ‘a lase dantigɛlisɛbɛn dɔ kɔnɔ k’u ka baganmarala fosi kana taga Mali la.

Farafinna kelenyatɔnba ka ban ka Macky SALL kɔkɔrɔmadon a ka cɛbɔya la, o bɛ mun falen?

Jumadon tɛmɛnen farafinna tɔnba ka lajɛrɛ dɔ senfɛ, tɔn in k’a tena Sénégal jamanakuntigi kɔrɔ Macky Sall ka cɛbɔya kɔkɔrɔmadon ONU ɲɛmaaya la. Sénégal marabaaw fana y’o kelen de fɔ. Macky Sall ka cɛbɔyasɛbɛn bilara Burundi de fɛ nga Sénégal ni farafinna tɔnba ka ban k’a kɔkɔrɔmadon o be dɔ bɔ a ka fanga la wa?  Mun de kɔsɔn, Macky Sall te ka farafinna ka dɛmɛ sɔrɔ. Bi ntɛnɛ kɛnɛ sigi ra o baabu de kan.