Ávvir Podcast, Avvir

Nigás, dahje Ánte Niillas Eira, leat máŋga fearána ja vásáhusat Máze giliviesus. Mii lea mii vázzá tráhppaid ihkku ja vuorjá gussiid geat idjádit giliviesus? Ja mii dáhpáhuvái go mánná fáhkka deaddiluvvui seainni vuostá? Dán oasis gulát Nigá muitaleame vel golbma fearána mat galget leat dáhpáhuvvan Máze giliviesus.

Ánte Niillas Eira, dahje Nigá, lei máŋga jagi Máze valáštallansearvvi jođiheaddji. Ovtta eahkeda lei son akto bargame kántuvrras Máze giliviesus go fáhkkestaga gullogohte jienat. Sáhttet go leahkit dološ koahka lávkkit mat ain gullojit giliviesus vai leat go dušše  boares vistti jienat mat skillet? Ja manne Nigá biila ii vuolgán go áiggui báhtarit?

Lea fargga logi jagi áigi go Norgga ilgadeamos terrordagut dáhpáhuvve Norgga Ráđđehusvisttis ja Utøyas. Utøyasullui ledje badjel 500 nuora čoahkkanan Bargiidbellodaga jahkásaš nuoraiddeaivvadeapmái go terrorista fallehii sin. 69 nuora gottáhalle. 66 nuora roasmmehuvve. Máŋggas sis ja sin oapmehaččat rahče ja bohtet agibeaivvi rahčat. Mun lean ságastan Anette Sombyin gii jáhkii massit oappás dalle. Son lea gearggus almmolaččat muitalit iežas historjjá.

Ellen Anne Hætta Eira lei 16 jáhkásaš go vásihii dakkár oainnáhusa maid ii goassege nuppes leat oaidnán. Oainnáhus lei mearragátteguovllus, Giđđavággegierragis.

Ovdalaš áigge lávejedje juovlavuoddjit herggiiguin johtit Ássebávtti meattá Kárášjohkii. Muhto dán guolbanis vásihedje heargevuoddjit imašlaš dáhpáhusa. Jergolaš, Niillas Ánde Eira, muitala fearána mii balddihii dan čieža juovlavuoddji, juovllaid áigge 1952:s.